معظم رواد الأعمال واللي عاوزين يعملوا مشروع بيهتموا بالفكرة والمنتج وكيفية تنفيذه بشكل جيد، بس بعد كده بيقابلوا مشكلة كيفية تأسيس الشركة من الناحية الإجرائية والقانونية.

وعشان تأسس أي شركة لوحدك، والكلام هنا عن مصر، لازم تعرف الأول نوع شركتك إيه، وبما إنك هتأسسها لوحدك فدي بتتسمي "شركة فردية"، وهي الشركة اللي بيملكها شخص واحد وبيكون مسئول عنها مسئولية كاملة يعني مش معاه شركاء، ولازم تنطبق عليك الشروط دي وهي إنك يكون سنك معدي ال 21 سنه، ومعاك راس مال ميقلش عن 100 ألف جنيه، وده اللي بينص عليه قانون الاستثمار المصري رقم 72 لسنة 2017.

طيب لو كانت الشروط دي تنطبق عليك تعمل إيه عشان تسجل شركتك ؟!

• تأكد الأول إن الأوراق دي موجودة معاك:

- صورة بطاقتك الشخصية.

- عقد تمليك أو عقد إيجار للمكان اللي هتأسس فيه شركتك، ولازم يكون العقد متوثق بالشهر العقاري.

- وصل كهرباء حديث (لو كنت مأجر المكان)، وده مهم جدا عشان مأمور المعاينة يتأكد إن المكان مظبوط.

- هتصور الأوراق دي كلها 4 نسخ وتخليها معاك.

وفيه حالات تسجيل بتحتاج أوراق تانية، زي إذا كان فيه حد تاني هو اللي هيسجلك شركتك بياخد نفس الأوراق دي بس لازم تعمله توكيل ويكون منصوص فيه على تأسيس شركة، وياخد صورة بطاقته معاه.

• طيب خلصت تجميع الورق تعمل إيه ؟! هتروح بالأوراق دي "مصلحة الضرائب العامة" التابعة للمكان اللي هتعمل فيه شركتك، وتقولهم عايز أفتح شركة فردية، على طول هيديلك نموذج اسمه ( 18 حصر)، وهتملاه وتديله نسخه من الأوراق اللي معاك ، وطبعا هيكون معاك أصل الأوراق عشان يطلع عليه، وبعدين هيحددولك معاد للمعاينة، وغالبا مش بتاخد وقت كبير يعني بتكون في حدود أسبوع.

• بعد المعاينة بيتكتبلك خطاب موجه لغرفة التجارة المصرية – التابعة لمقر الشركة بتاعتك بردو – ودا بديل مؤقت للبطاقة الضريبية بتاعة شركتك، يعني بتقدر تستخدمه في تخليص باقي الورق لحد البطاقة الضريبية ما تطلع ودا بياخد وقت في حدود من أسبوعين ل 3 أسابيع حسب ظروف العمل.

• لما بتروح الغرفة التجارية، هناك هتملي نموذج اسمه " ترخيص مزاولة تجارة “، وتأكد إن البيانات اللي كتبتها في النموذج ده نفسها اللي كتبتها في النموذج 18حصر، وبجانب المعلومات دي هتحدد راس مال شركتك، واللي طبعا مش هيقل عن 100 ألف جنيه زي ما قولنالك فوق.

• بعد كدا بيتم تسجيل بيانات شركتك على الكمبيوتر، وبتاخد الترخيص بتاع مزاولة النشاط، وبكدا تكون شركتك خدت الصفة الاعتبارية يعني بقت هيئة مسجلة حكوميا، وبيكون فاضلك خطوات بسيطة لتسجيل الشركة في السجل التجاري، وفي بعض الغرفة التجارية - زي الغرفة التجارية في القاهرة - بيكون السجل التجاري والغرفة التجارية في مكان واحد، فبمجرد ما بتخلص التسجيل في الغرفة بتطلع علي السجل التجاري فنفس المبني وبتخلص فيه القيد، وبتدفع رسوم أزيد حاجة بسيطة.

• في السجل التجاري بتاخد معاك الأوراق دي:

- شهادة مزاولة التجارة اللي خلصتها من الغرفة التجارية.

- البطاقة الشخصية بتاعتك.

- رسوم التسجيل.

- وكمان الموافقة الأمنية لو كان نشاط الشركة يستدعي ذلك زي محلات السلاح أو شركات الأمن وهكذا.

• في السجل التجاري بتعمل نموذج اسمه " نوذج 1" ( وبتكتب فيه نفس البيانات بردو ) وبعدين بتدفع الرسوم المطلوبة وتستلم السجل التجاري تاني يوم علي طول، وبكد تكون خلصت إجراءات تسجيل شكرتك وتقدر تبدأ نشاط في أي وقت.

فيه حاجة لطيفة جدا أقرتها وزارة الاستثمار في قانون الاستثمار الجديد وهي خدمة التسجيل الإلكتروني للشركات علي الموقع الإلكتروني بتاعها، يعني بتقدر تسجل شركتك علي الموقع من غير ما تحتاج تروح الأماكن دي كلها في خطوات سهلة:

• أول خطوة بتعمل حساب علي موقع وزارة الاستثمار داhttps://goo.gl/5etjCY ، وبتدخل علي خدمة التأسيس الإلكتروني للشركات.

• بعد التسجيل على الموقع بتملى نموذج تأسيس الشركة ودا بناء على نوع شركتك، وهترفع الأوراق المطلوبة، وهي نفس الأوراق اللي بتجهزها في التسجيل العادي، وكمان ممكن تدفع رسوم التأسيس كلها على الموقع من خلال الفيزا.

• بعد كدا بتوقع على أوراق التسجيل على الموقع، وبعدها الهيئة بترد عليك بالموافقة في خلال 3 أيام.

• بعد الموافقة هتروح هيئة الاستثمار عشان التوقيع في مكتب الشهر العقاري، وممكن تدفع رسوم التأسيس هناك لو مدفعتش على الموقع، وبكدا يكون اكتمل التسجيل وتقدر تبدأ شغلك في أي وقت.