إدارة الوقت

هنتكلم النهاردة عن مهارة مهمة لازم تكون عند الخريج اللي بيدور على شغل والموظفين في مختلف الشركات، إدارة الوقت؟ وهي عملية تنظيم وتخطيط وتقسيم لوقتك بين أنشطة محددة، والإدارة الجيدة للوقت بتخليك تعمل شغل كتير في وقت قليل، ولما تحس ان الوقت ضيق والضغوط كتير ده معناه مشكلة في إدارة وقتك وده بيقلل كفاءتك ويسبب الإجهاد.

إدارة الوقت يعني العمل بكفاءة، وأصحاب العمل في كل صناعة بتدور على الموظفين اللي بيقدرو يستفيدوا أكتر استفادة من وقتهم في الشغل، لأن توفير الوقت هو من توفير أموال الشركة وزيادة الإيرادات.

ليه صحاب العمل بيطلبوا موظفين عندهم مهارة إدارة الوقت بشكل جيد؟ الموظفين اللي بيديروا وقتهم بشكل جيد بيكونوا أكثر إنتاجية، وأكثر كفاءة، وأكثر وفاءاً بالمواعيد النهائية، وبيركزوا على المهام اللي بتكون أكثر أهمية وحساسية للوقت وبيقللوا من مقدار الوقت اللي بيضيع علي مهام غير ضرورية.

الإدارة الفعالة للوقت تتطلب تحليل عبء العمل، وتحديد الأولويات، والتركيز على أهداف الشركة، والموظفين اللي بيبقى عندهم إدارة وقت ممتازة بيبعدوا نفسهم عن أي نوع من الإلهاء وبيخدوا دعم من زملاءهم خلال شغلهم عشان يقدرو يخلصوا المهام المطلوبة.

خلال مقابلة الوظيفة هتتسأل أسئلة لتقييم قدرتك على إدارة وقتك، والوقت اللي هتديه لفريقك لو هتبقى في دور قيادي.

هنوضح في نقاط دلوقتي الصفات اللي لازم تبقى عندك عشان يكون عندك مهارة إدارة الوقت:

- ترتيب الأولويات : من المستحيل انك تشتغل على كل المهام في آن واحد وتخلصها، بس لو نظمت أولوياتك حسب أهميتها هتقدر تخلص المهام اللي وراك.

- لما تيجي تحدد أولويات المهام لازم تبص على كذا عامل، زي المفروض المهمة دي تخلص إمتى؟ هتاخد وقت قد إيه؟ إيه مدى أهميتها بالنسبة للآخرين في الشغل؟ إيه اللي ممكن يحصل لو المهمة متعملتش؟ وهل المهمة دي ممكن تنقطع في النص لأنك هتستني شخص تاني ليه دور فيها؟

- الجدولة : بمعنى انك تدي لكل مهمة وقت محدد، وأغلب الناس بيبقى ليها أوقات فى اليوم بتبقى أكتر أو أقل حيوية، فبيكونوا أكثر إنتاجية لما يظبطوا وقتهم مع الأوقات اللي بيكونوا فيه أكثر حيوية، والجدولة برضوا بتبقى طريقة كويسة لتجنب المماطلة والتأجيل للمهام.

- حفظ قائمة للمهام : بمعنى انك تعمل قائمة لكل أولوياتك بترتيب الأهم فالمهم مع الجدولة ليهم، ودي بتبقى طريقة كويسة عشان تتجنب انك تنسى حاجة وعشان تتجنب انك كل يوم تفكر المفروض وراك إيه تعمله.

- تفويض المهام: وده يعتمد على نوع الشغل بتاعك لو ينفع انك تفوض فيه بعض المهام لغيرك، وساعات بيبقى فيه ناس بترفض مبدأ التفويض بهدف فرض سيطرتهم على المهمة أو عشان يوفروا فلوس، وكلا النهجين غلط تماماً لأنه بيضر في النهاية الإنتاجية ويرفع التكلفة.

- الراحة : من الحاجات المهمة لإدارة الوقت، على الرغم ان الشغل لساعات طويلة يؤدي أحيانا لتحسين الإنتاجية على المدى القصير، بس في وقت لاحق ده هيستنفذك وهيخلي إنتاجك يقل، وباستثناء الحالات الطارئة زي انك لازم تخلص مهمة عاجلة، حط لنفسك فواصل للراحة ووقت بتوقف فيه شغل فى الجدول الخاص بيك.

وربنا يوفق كل موظف ناجح ويقدر يدير وقته بشكل صحيح يرفع من انتاجيته وبالتالى انتاجية العمل