رسالة من الإنبوكس:

بدأت شغلي الحالي من سنة فاتت، بس حاسس إني بقالي أكتر من مجرد سنة واحدة!! وأقصد هنا إن طول المدة ليه أسباب سلبية، مش عشان الوظيفة رائعة.

من أول يوم بدأت شغل كان واضح جدا إن مديرتي كذبت عليه بخصوص المنصب بتاعي، قبل أما أبدأ شغل كان كلامها بيأكد إن دوري في الشركة هيبقى كبير، لكن السنة إلي فاتت أنا اشتغلت حوالي 20% بس من إلي المفروض كنت أعمله في الشركة.

حاولت أطلب منها إننا نقعد نجتمع ونتكلم عن التوصيف الوظيفي الأصلي إلي أنا كنت جاي عشانه، رفضت وقالتلي إحنا كده تمام قوي، ماتقلقش نفسك.

مديرتي من الناحية الشخصية إنسانة مرحة وسعيدة.. لكن هي مديرة رهيبة، مش بتدي فرصة لحد يعمل شغله كما يجب أن يكون، لازم تتدخل بنفسها في كل حاجة، ومافيش شغل بيمشي إلا لما تدي موافقة على كل خطو فيه، رفضتلي 12 فكرة قدمتهالها بعد ما كانت وافقت عليهم في الإنترفيو بتاعتي، أعتقد إنها وافقت على أفكاري قبل كده بس عشان تخليني أقبل الوظيفة، وبمجرد ما دخلت رجلي الشركة، اتمسح كل الكلام إلي وافقت عليه في الإنترفيو.

أنا بسمع دائما إنه الأفضل أكمل إني في أي وظيفة سنتين على الأقل، بس أنا ما استفتدتش أي حاجة من الـ12 شهر اشتغلتهم في الشركة ديه، أنا فعليا ما عملتش أي حاجة إضافية أو مختلفة عن إلي اشتغلته قبل كده.

هل المفروض أبدأ فعلا أدور على شغل تاني؟

الرد:

بما إن الساعة عمرها ما بتقف، والوقت دائما بيعدي ومابيرجعش تاني، فلو مش بنتقدم في حياتنا وشغلنا، يبقى فيه حاجة غلط.

واضح جدا إنك شخص بتحب تطور من نفسك دائما، فلو مش قادر تتطور في الشركة إلي إنت فيها، فاستمرارك في الشغل يعني إنك بتأذي نفسك بجد.

إنت تستحق وظيفة تقدر فيها تتقدم وتتطور وتتعلم، إنت محتاج تشتغل مع مدير صادق، ينفذ وعوده إلي خلتك تقبل الوظيفة من الأساس، وإلا هتبقى بتضيع وقتك وبتهدر موهبتك.

خليني أقولك 10 علامات لو حصلوا يبقى ده دليل قاطع إنك بتضيع موهبتك في مكان شغل غلط مش مناسب ليك:

1- لو لقيت العالم بيتغير من حواليك وشركتك مكانها مش بتتغير، وتوصيفك الوظيفي زي ما هو شهر بعد شهر من غير أي تغيير أو تطوير.

2- مديرك مش مهتم إنه يجرب حاجات جديدة، ومش مهتم إنه يّدخل آليات تحسن من الشغل وتفتح باب الإبداع والتجديد، عشان كده هيبقى صعب قوي تضيع وقتك وإنت بتشتغل لمدير زي ده.

3- لو جربت مرات كتير وفشلت في إنك تخلي مديرك منفتح للتغيير.

4- لما يبقى عندك أفكار كويسة لتطوير شغلك وتطوير الشركة، وتبقى من جواك عارف ومتأكد إن أفكارك مش هتشوف النور.

5- لما تلاقي إنك إنت الوحيد إلي حاسس بالغضب، وإنت الوحيد إلي عايز مديرك يتغير ويتقدم نحو المستقبل ويتطور عشان الشغل يتطور.

6- لما تبص حواليك ماتلاقيش حد ممكن تتعلم منه حاجة جديدة، مش لازم مديرك، ممكن زميلك في القسم أو حتى في قسم تاني.

7- دائما بتشوف في أحلام اليقظة بتاعتك إنك بتشتغل في وظيفة بتحقق فيها أحلامك وبتلاقي فيها إلي بتتمناه عشان تتقدم وتتطور في مجالك، وبتحس فيها إن دورك مهم في الشركة، وإنت مش لاقي أي حاجة من دول في شغلك الحالي.

8- لما بتفكر في المستقبل وإنت في نفس الشركة، ومش بتشوف أي تغيير ممكن يحصلك.

9- بتحس بضيق شديد يوم السبت بليل، عشان بكره هيبدأ أسبوع جديد من العمل.

10- إحساس قوي جدا جواك ومسيطر عليك إنك بتكره وظيفتك.

إنت ضيعت سنة كاملة من عمرك في الشركة ديه، وده أكثر من المطلوب، لازم تبدأ تدور على شغل جديد، كمان بحثك عن شغل تاني دلوقتي، هيقلل من معاناتك وتأثرك بسلبيات وظيفتك الحالية.

أتمنى لك كل الخير، وبالتوفيق