1 - قبل البداية اعرف نفسك كويس جدًا و اعرف أنواع العمل فى الحياة وإيه يناسبك بالظبط

(Freelance-entrepreneur-job عمل حر - رائد أعمال – وظيفة)

يعنى لو إنت بنظام على قد لحافك ورجليك يبقى إتكل على الله وإتوظف ومليمين آخر الشهر بس ولاتشتكى ولاتحسد لأنك مستمتع بالكسل وبتشوف برامج التوك شو كلها دا غير اللب وقعدة القهوة وخناقات الكورة

لكن لو كنت بتتقن مهنة زى الكاتب أو المصور أو الاستشارى فإنت كده عمل حر وممكن يكبر ويصبح بيزنس .

- أما ياعبقرى لو إنت طموح ومبادر ودماغك لاسعة ومبدع وصاحب أفكار مسهراك الليالى تعد النجوم ولا ابن الملوح – ألف مبروك عليك عبلة والشقا وطبعًا العائد المادى وتبقى مننا هنا ومكانك جنب إخواتك الشقيانين اللاسعين ودماغهم مطرقعة .

2 - إعرف الفرق بين ريادة الأعمال والبيزنس دا هايفهمك أمور كتير .

3 - إعرف الفرق ين خطة العمل ودراسة الجدوى .

- دراسة الجدوى حاجة بسيطة بنعملها للجزء المالى أو بنعملها لما نكون هانقنع شخص بمشروعنا للشراكة أو التمويل أو حتى وإنت بتقنع الادارة العليا فى البيت بالمشروع .

أما خطة العمل دى الحدوتة اللى من أول صلوا بينا على النبى لحد وتوتا توتا يعنى من الأف للياء بالمشروع .

4 - الفرق بين المبيعات والتسويق والترويج

- التسويق : واحد أساسه ابداع ودماغ ووظيفته يقولك هاتعمل ايه ومع مين وفين ؟ لأن العمليات هايقولك هاتعمله إزاى مثال : زجاجة الكوكاكولا التسويق يقول الزجاجة رفيعة من النص والعمليات يقول تتعمل إزاى دا جزء الزجاجة فقط وليس الكل .

- المبيعات : هاياخد المنتج ويتعامل به فى السوق ودول بجد ربنا معاهم ولازم يكون فيه صفات خاصة .

- وأنا دايمًا أقول عليهم إن علاقتهم ببعض التسويق والميعات زى الجواز الفاشل بمعنى المتوقع من الجواز اتنين يكملوا بعض ونتايج ناجحة وحياة سعيدة لكن الواقع فى حالات الفشل إنهم بس مع بعض بسبب العيال أو المجتمع أو أى حاجة ومش بيتفقوا كذلك المبيعات والتسويق مع بعض لأنهم فى شركة واحدة بس بتوع المبيعات بجد عليهم عبىء كبير ورخامة البشر فى السوق .

5 - الفرق بين الادارة والادارة العليا

- الادارة العليا بالبلدى الناس اللى فوق وأصحاب القرار بشكل عام .

- الادارة هى التنفيذ على الأرض للادارة العليا من أول رئيس العمال لحد المدير العام .

6 - الحياة الشخصية : دى جوهر الشخص وقناعاته وانتمائه وهى كالتالى :

- أولًا التعاملات الشخصية بالسوق اتعامل و البس جونتى شفاف منعًا للتلوث الأخلاقى وكمان منعًا لعداوتهم يعنى شغل دماغك قوى واحترس من الجنس الآخر سواء كنت رجل أو سيدة دى حلقة فى ودنك قبل الشغل كمان .

- ثانيًا البيت : إختصر وارفع راية السلام وإلا اتحمل هجمات وصواريخ ومدرعات وبرده هاتسلم فهات من الآخر بس بذكاء واشترى دماغك وإلا إنت الخسران وهاتتشتت بمعنى اتجاه الرياح فين معاهم ولكن بداخلك الدفة فى إيدك وريح الكل .

ثالثًا الأصدقاء : أو أى متنفس ضرورى جدًا مثلاً يوم مع الأصدقاء أو ممارسة رياضة أو رحلة على يخت وإستمتع بالبحر أو سفرية فى مكان ترتاحله أو تلعب مع أطفال أو تروح ملاهى حتى لو هاتركب قطر اسكندرية القاهرة لوحدك وتتفرج على الناس وترجع تانى

- المهم يكون فيه نوع المتنفس والراحة والمتعة .. اتجنن لحظة وإطمن النتيجة هاتنور بعدها .

7 - معانى هامة زى نموذج الأعمال والقيمة المضافة هم إيه وهاتجيبهم منين فى مشروعك ؟

Business Models - Add value دا الهوم ورك فى مدرسة البيزنس بتتبع أحدث النظم بالتعليم وهى البحث وليس التلقين .

8 - BRAND هاقولها كل حلقة لأنها العمود الفقرى المعدوم فى أعمالنا العربية .

9 - تفكيرك يكون خارج الصندوق out of the box

بمعنى ماتاخدش محل وتحط بضاعة وتحط إيدك على خدك تستنى العميل يدخل يشترى .. يبقى إنت كده عم سيد بتاع الجبنة

10 - خلى العلم مرجعيتك .. كل خطوة تخطيط .. إدارة .. الخ تكون على أساس علمى .

ودا بطريقتين إما تختصر وتاخد استشارات من متخصصين أو تكلف مكتب بنوع احتياجك .

أو تدرس براحتك ودا مشوار طويل ومهما درسنا استحالة بتكون زى المتخصص لأن دا عمله .

وانتظروا مفاجاة الحلقه الجايه وانتوا داخلين كى جى 2

ا/أمل حسن

مستشارة إعمل بيزنس فى مجال الcoach والإستشارات