فاكرين المثل اللى بيقول لا تعطنى سمكة ولكن علمنى الصيد

هو مثل كلنا حافظينه وكلنا بنتريق عليه أحيانًا ولكن المثل ده جزء من منهج إعمل بيزنس وهو إننا مش عايزين نقول الناس بشكل تفصيلى إزاي تفتح مشروع ونمليهم إزاي يحلوا مشاكلهم جوا المشروع ده ولكن بنحاول نعلمهم إزاي يفتحوا مشروع ونديهم منهج يمشوا عليه ونوصلهم طريقة حل الأزمات بشكل عام وكل واحد يسقط اللي بيتعلمه جوا مشروعه لأنه ببساطه شديدة :-

- العلم واحد لكن طرق تطبيقه متعددة .

- مفيش حل ينفع لكل الناس ممكن كل حل بنقدمه ينفع واحد ومينفعشى التانى .

- حتى الحل اللى ينفعك النهاردة فى ظروف معينة مش هاينفعك فى ظروف تانية وفى وقت تانى .

علشان كده إحنا بنحاول إن علوم الإدارة اللى إحنا قسمناها ل 30 علم نوصلها بشكل سهل ومختصر ومناسب لجميع الناس مش لفئة معينة عندها خبرة كبيرة وبنحاول ننوع فى طرق توصيل المعلومة مابين بوستات قصيرة وطويلة وقصص نجاح وفيديو أو محاضرة كل ده علشان نوصل معلومة إدارية دمها تقيل بشكل بسيط شوية وده على قد مجهودنا وفهمنا

عايز أقول حاجة مهمة إننا بدأنا نجهز لكذا موضوع زى دراسة الجدوى وخطة العمل وهنبدأ ننزل بيهم تباعًا علشان الموضوعات دي مطلوب التعرف عليها لبدء الشركة والحصول على التمويل ....

وربنا يوفقنا فى تحقيق هدفنا ويوفقكم فى الإستفادة من المعلومات اللى بنقدمها وربنا يوفق الجميع