أفريقيا هى الحلم، الكنز المجهول، بلاد الدهب وعلشان كده بدأنا معاكم سلسلة #الاستثمار_فى_أفريقيا وأول بلد فى رحلتنا كانت رواندا ومحطتنا التانية هى دولة كينيا.

كينيا بتشتهر بالحياة البرية والمناظر الخلابة، عدد سكانها 30 مليون نسمة واللغة الرسمية هى اللغة الانجليزية، كينيا دولة ساحلية بيقع جزء منها علي المحيط الهندي ومناخها بيختلف من منطقة لأخرى. كينيا بتشتهر بزراعة الموز والذرة والقمح والبن والشاي.

كينيا من الدول الأفريقية الجاذبة للاستثمار بشكل كبير لأكتر من سبب هنكلمكم عنها فى النقط الجاية

1- تحتل كينيا المرتبة الـ 5 في تصنيف افضل دول الاستثمار في افريقيا بإجمالي ناتج محلي 60 مليار دولار ده غير ان منتدي الاقتصاد العالمي بيصنف كينيا في المرتبة الاولي من حيث جودة رأس المال البشري وتوافر البحوث والابتكار بالاضافة الي ان 72% من سكانها بيمتلك انترنت.

2- كينيا عضو في الاتفاقات التجارية ومستفيدة من قانون النمو والفرص في أفريقيا (AGOA)، ومنظمة التجارة العالمية، واتفاقية التجارة EAC-EU. وكمان عضو في مجموعة شرق إفريقيا (EAC) والسوق المشتركة لشرق وجنوب إفريقيا (الكوميسا) بالاضافة الي مجموعة (SADC) الأفريقية.

3- بتتميز بقطاع مالي قوي وبتحتل المرتبة 42 في العالم من بين 140 دولة لتطوير الأسواق المالية حيث يوجد في كينيا سوق الأسهم الأكثر تطوراً في منطقة شرق ووسط أفريقيا (بورصة نيروبي).

بدأت تفكر فى الاستثمار فى كينيا؟ غالباَ هتتأكد بعد ما تعرف اجراءات الحصول على فيزا كينيا ????

كينيا من الدول اللى بتسهل الحصول على الفيزا الخاصة بيها خصوصاَ فى حالات الإستثمار والتقديم أونلاين من خلال الموقع ده http://evisa.go.ke/

سعر الفيزا هو 51 دولار ولو دخلت علي الويبسايت ده هتلاقي كل الاسئلة اللي محتاج تعرفها عشان تحصل علي فيزا وكمان تقدر تتعرف علي الأنواع المتاحة منها والجنسيات المسموح لها بالدخول وبرضوا تقدر تستخرج تصريح العمل الخاص من علي نفس الويب سايت بتكلفة 149.11$ لمدة شهر واحد.

طبعا دلوقتى شايف انك لازم تاخد خطوة الإستثمار فى كينيا! طيب لو عايز تفتح شركة في كينيا ايه هي الخطوات؟

كل الخطوات الخاصة بإنشاء شركات فى كينيا متاحة من خلال الويبسايت ده https://www.ecitizen.go.ke/ ومن خلاله بتقدر تنشئ حساب وهو بيقولك ايه هي انواع الشركات وايه هي مميزات كل نوع وتكلفة الرسوم الخاصة بكل حاجة وكمان بتنزل من عليه نموذج لكل الورقيات اللي انت محتاجها بس الشركات ذات المسئولية المحدودة بيتم التسجيل يدويا تكلفة رسوم حجزاسم للشركة 1.49$ وبتستغرق وقت من 5 الي 10 شهور. و تكلفة رسوم تسجيل شركة 105.87$ وبتستغرق وقت من 10 الي 30 شهر وبتقدر تعمل الخطوة ديه بعد انتظار من 4 الي 10 ايام من الخطوة السابقة وبيكتفي برقم الطلب.

طيب لو عندك شركة فى مصر وعايز تفتح فرع فى كينيا هتعمل ايه؟!

لو عندك شركة خارج كينيا وعايز تسجل فرع ليك بترجع لدائرة تسجيل الشركات لإصدارشهادة امتثال بعد اتمام الاجراءات اللي بتطلب منك و بعد تسجيل الشركة بيتم تسجيلها لدي الهيئات الحكومية زي الصندوق الوطني للضمان الاجتماعي و الصندوق الوطني للتأمين على المستشفيات و هيئة الإيرادات الكينية والحصول على تصريح عمل من حكومة المقاطعة اعتمادًا على الموقع الجغرافي وعدد الموظفين ونوع العمل بالاضافة الي رخصة تجارية ، وشهادة إزالة الحرائق ، ورخصة لافتات إعلانية وشهادة صحية ، ورخصة صحة الغذاء وكل رخصة بتكون حسب نوع النشاط.

كده تقريباَ اتكلمنا عن الجزء الأول و فى الجزء التانى هنشرح أكتر كل التفاصيل الخاصة بالصناعات الأكتر انتشار فى كينا، أكتبولنا أسئلتكم واستفساراتكم وهنجاوبكم عليها فى الأجزاء الجاية وما تنسوش تعملوا شير علشان تعرفوا ناس أكتر ازاى ممكن يستثمروا فى كينيا.