ملاعب النجيل الصناعي والترتان هي واحدة من المشاريع المنتشرة جدا وكمان الناجحة حاليا، بس عشان تعمل مشروع ملاعب ناجح لازم تعرف أن فيه اكتر من مرحلة لازم تعدي عليهم وكلهم مهمين.

اولا وقبل اي حاجة عشان تنجح في المشروع ده لازم تكون بتفهم في الكورة، لأن فيه تفاصيل كتير مهمة سواء في التجهيز أو التنفيذ أو التسويق أو الإدارة وحتى الصيانة محتاجة إنك تكون بتفهم في الكورة، فلو معاك راس مال حابب تستثمره بس ملكش في الكورة فنجاح المشروع معتمد على إنك تشارك حد بيفهم في الكورة، عشان أساس نجاحك مش إنك نعمل حاجة غالية وخلاص إنما إنك تعرف توصل للتوازن سواء بين إنك تقدم خدمات مقبولة لعملائك وبين تكلفة معقولة المشروع.

ثانيا لازم تبتدي بدراسة تفصيلية جدا للمكان اللي ناوي تفتح فيه، عشان تعرف مين هو عميلك وإيه احتياجاته سواء من عدد المدارس والمعاهد والجامعات وحتى مراكز الدروس اللي حوليك ومتوسط الأعداد والتنوع فيها وكمان الكثافات السكانية القريبة منك وطرق المواصلات ليها وده غير المستوى الاجتماعي والثقافي للمكان ومتوسط أسعار العقارات فيه مساحاتها وحجم المنافسة في المكان وأنوعها، والمكان المثالي هو إنك تكون في مكان نسبيا فاضي عشان الدوشة اللي ها تعملها وفي نفس الوقت قريب قدر الإمكان من أماكن سكنية ودراسية ومتوسط الاعمار فيهم يكون صغير.

ثالثا مساحة الأرض اللي أنت محتاجها في المتوسط للملعب الخماسي 20*40 (800م) وللسداسي 25*45 (1125م) وللسباعي 33* 53 (1750م) دا غير مساحات الخدمات زي غرف الملابس الخدمات وهنا الإيجار بيتحدد على حسب الموقع والمساحة من أول 5-7 الاف في الشهر ل 30-40 ألف برضوا في الشهر.

رابعا نوع أرضية الملعب ممكن تكون نجيل طبيعي وديه أرخصهم لكن هاتديك حوالي 10 ساعات للعب في الأسبوع بس وتكلفة صيانته عالية جدا.

أما النجيل الصناعي فيه أنواع وأسعار كتير من أول 150 للمتر وأحسن أنواعها هما الإيطالي أو التركي و في الألماني بس ده غالي شويتين، وكلهم بيدوك 24 ساعة لعب في اليوم بشرط الاهتمام بالصيانة الدورية اللي ممكن توصل بعمر الملعب من 5-8 سنين وكمان في الترتان أو الاكريليك ودا في الأساس للملاعب المتعددة زي كرة الطائرة والسلة وملاعب التنس وكورة القدم في الصالات وفي ناس بتفضل تعمله لأن عمره الافتراضي طويل جدا مش بيحتاج غير صيانة بسيطة، ودا بيكون أعلى الملاعب سواء في العائد للمستثمر أو في السعر للاعبين.

خامسا مراحل الإنشاءات وتأسيس الملعب سواء للأرضيات أو التجهيزات زي الأسوار والفواصل الحديد وشبك الحماية الجانبي والعلوي وكشافات الإضاءة عددها وحجمها ونوعها وغرف الملابس والحمامات ولو في مدرجات فنوعها وحجمها كمان ها يفرقوا كتير سواء في التكلفة او العائد.

سادسا المكسب الحقيقي اللي هايغطي مصاريف المكان بجد هو الخدمات اللي هاتوفر للمكان زي الكافيتريا وتجهيزاتها وعرض المباريات فيها سواء محلي أو دولي أو مشفر، هل في مكان للألعاب زي البلياردوا وبينج وكمان البلاي استيشنPS وال إكس بوكس Xbox واعدادها وديكورات المكان والافكار الجديدة زي "بن باج" أو "ليزي بوي" او حتى فرد كاوتش متنجدة، وكمان ادارتك للمكان بشكل ذكي في حاجات زي أكاديميات للكورة واللعاب فردية زي والعاب القوة والكاراتيه والكونج فو ودورات رمضانية ودوري مدارس ودوريات شركات في اوقات مختلفة على حسب مكان الملعب.

تكاليف مشروع الملاعب ممكن تبتدي معاك من 200-250 ألف عشان فيها عوامل كتير زي نوع العشب الصناعي وكثافته، وبلد المنشأ واسم المصنع، وشهادات الاعتماد والجودة، والشركة المنفذة والمعدات اللي هاتستخدمها، ومراحل تأسيس الملعب زي الحفر وطبقات الرمل والدبش ودكهم وتمهد السطح وعمل ميول تصريف المياه وطبقة الخرسانة الأساسية، وكمان الخامات المستخدمة لتركيب النجيل الصناعي (سيليكا، رابر، لاصق النجيل الصناعي، التيب)، وعقد الصيانة اللي لازم تعمله لو عاوز تطول عمر الملعب، و كل ده غير تكليف التسويق والافتتاح اللي عليهم عامل كبير في استمرار ونجاح المشروع.

لكن حتى مع الإدارة الذكية للمكان ومتوسط تأجير الملعب اللي يكون بـ 80-120 جنيه في الساعة الصباحي وبـ 100-140جنيه للمسائي، فلازم تعرف ان المشروع ده ليه مواسم يعني في اوقات زي بدايت المدارس أو الامتحانات أو مع التقلبات الجوية زي الحر والبرد والمطر والتراب بتأثر كتير على الشغل، وفي اوقات ممكن توصل بالإشغال في المتوسط ل 4 ساعات صباحي و4 مسائي يعني دخل 320صباحي و400مسائي بأجمالي 720 يومي يعني 21.600 شهري في المتوسط.

ده غير الدخل اللي بيطلع من الكافتيريا وباقي الخدمات والألعاب اللي ممكن يعدي دخل الملعب نفسه، يعني مع حساب مصاريف التشغيل والصيانة وحساب عائد معقول ليك ممكن تغطي راس المال خلال سنة ونص لسنتين ومع متوسط عمر افتراضي للمشروع من 5-8 بشرط التأسيس المضبوطة والاهتمام.

طيب حد يجي يقول لما الموضوع حلو مربح كده ليه في ناس كتير فتحت وخسرت فلوسها أو ليه مش كل الناس بيتعمل المشروع ده، من ناحية مشاريع الخدمات الترفيهية هي اول حاجة بيتضحى بيها مع الظروف الاقتصادية، ده غير موسمية الطلب اللي ناس كتير بتكون مش حطاها في حساباتها، ومن الناحية تانية فالتقصير في دارسات الجدوى والسوق والمكان والمنافسة

وكمان أي غلطه أو استعجال في تأسيس الملعب بخامات أرخص من التوسط هيكون مكلف جدا للمشروع سواء في إعادة تأسيسه وكمان في سمعته، لأنه هايعتبر التقصير في الوصول لمستوي خدمات مقبول من العميل ومناسب لمستوى الحي بتكلفه معقوله، والمشاكل زي سوء الإدارة للنشاط أو لتدفقاته النقدية أو الإهمال في النظافة أو الصيانة أو الامن والنظام.

مشروع ملاعب سواء نجيل صناعي أو ترتان من المشاريع المنتشرة والمربحة حاليا، بس زي ما ليه مميزات كتير كمان فيه مخاطرة مش بسيطة، لكن النجاح فيه بيعتمد على معرفتك لتفاصيل المشروع ودراسته بشكل جيد .