فيه حتة جامدة جداً فى التسعير خصوصاً في السوبر ماركت والتجزئة بس بتنفع في أي مجال .... أي سوبر ماركت لما بيعمل كود للسوفت وير اللي بيشغله بينزل حوالي 30 ألف كود وده عدد الأصناف اللي ممكن يبيعها خلال السنة .... فيه بقى 100 صنف الناس الأذكياء مابتكسبش منهم يعني زي ما بيشتريه بيبيعه من غير أي مكسب يا تري إشمعنى ال100 صنف دول ؟

ال100 صنف دول اللي العميل حافظ تمنهم واللي هما بيشتريهم كل الناس تقريباً كل يوم فعارفين كويس قوي سعرهم زي السكر والملح .... إلخ طيب وباقي الأصناف ... باقي الأصناف بتبدأ من 5% لحد 30% في بعض الأصناف زي المثلجات المستوردة و100% في بعض الأصناف زي الجبن

في النهاية بيكون متوسط المكسب 8% يعني لو باع ب 10 آلاف ج يكسب فيهم 800 ج .

بس الفكرة إن أي حد بيشتري وهو حافظ الأرقام دي بيبقى عارف إن المكان ده رخيص لأن كل الأصناف اللي هو بيشتريها كل يوم وحافظ أسعارها بيلاقي سعرها أقل في المكان ده .

الموضوع بسيط صاحب المكان بيراهن إن ذاكرة العميل مش هتشيل غير عدد معين من الأصناف واللي هو بيديله سعر فيها أقل من أي حد فبياخد انطباع علي إن المكان رخيص وبيصبح زبون دائم وفي نفس الوقت المكان بيحقق مكسب كويس وبيقدم خدمة كويسة وطول الوقت العميل بيبقى حيران وهو بيسأل ... الناس دي بتكسب إزاي ؟