الموظف المتميز.. أحيانا ما ينفعش يبقى مدير!!

بتبدأ حياتك المهنية من منصب صغير في الشركة إلي بتشتغل فيها.. تجتهد في شغلك وتثبت نفسك ..وتبدأ تشق طريقك خطوة خطوة، لحد ما تترقى وتوصل لمنصب إداري كبير.. بالنسبة لأغلب الناس ده التطور الطبيعي للتقدم الوظيفي، بس النهاردة هنطرح سؤال غريب شوية: هل المناصب الإدارية دائمًا هي الخطوة الصح لتقدم الموظف الأعلى أداء والمتميز في شغله؟

بوست النهاردة بيعرض وجهة نظر مختلفة شوية، وبيشرح أسباب تخلي المدير ما يعينش الموظفين إلي أدائهم متميز في مناصب إدارية، وديه وجهة نظر ممكن ناس كتير تختلف عليها، لأن نسبة كبيرة شايفة إن الموظف الشاطر لازم مع الوقت يترقى في المناصب جوه الشركة.

الموظف الشاطر والمتميز مش بالضرورة يكون إداري شاطر، الذكاء والتميز في الشغل مش هيخليك تلقائي تكون مدير متميز.

ويمكن يكون هو ده السبب الرئيسي إلي يخلي أي مدير يتجنب تسليم الأدوار الإدارية العليا للموظفين المتميزين، ويقرر إنه لازم يسيب المناصب ديه للأشخاص إلي عندهم مهارات بناء فريق العمل ومهارات إدارة الأشخاص.

وعشان نفهم وجهة النظر ديه بشكل أفضل، خليني هنا أعرضلكوا بالتفصيل شوية الأسباب إلي تشرح الرأي ده:

المديرين المحتملين المفروض يتعينوا بناء على مهاراتهم الإدارية والشخصية، مش قدراتهم التقنية والفنية.

حتى الموظفين المتميزين إلي عندهم بعض صفات القائد بالفطرة، برضه مش كفاية، لأنه الصفات إلي عندك بشكل تلقائي مش هتخليك قائد ناجح في إدارة فريق العمل، إنت برضه محتاج تتعلم صفات تانية كتير، زي: التعاطف والتفاهم، الوعي الذاتي، التواصل القوي، ومهارات التواصل مع الآخرين، التعاون، التفكير الاستراتيجي، الحسم، الصدق والشفافية، الأصالة والجدارة بالثقة.

بعض الدراسات المتخصصة في الاستشارات وإدارة الأعمال بتوضح عيوب الترويج لأفضل موظف عندك، وإزاي إن الترقية للمناصب الأعلى بشكل تلقائي ليها تأثير سلبي على الموظف وعلى شغل الشركة.

والسبب في رأيهم إنك لما تكافئ موظف مبدع في مهنته، وترقيه لمنصب إداري أعلى وهو ماعندوش مهارات القيادة المطلوبة، ده هيكون ليه تأثير سلبي على أداء الموظف نفسه وبالتالي على الشركة ككل.

ممكن الموظف المتميز كقائد يعرف يمشي الأمور، ويخلي الوضع مستقر لفترة، لكن من غير مهارات القيادة المطلوبة.. أكيد فريق العمل هيجيله إحباط، وهيبدأوا يدوروا على مكان تاني يشتغلووا فيه.

طيب بعد ماعرفنا الأسباب إلي بيتبناها أصحاب وجهة النظر ديه، أكيد هيجي في بالنا سؤال مهم: الموظف المتميز والشاطر في شغله، طبيعي صاحب الشركة أو المدير يبقى عايز يقدره، لكن وجهة النظر إلي بنتكلم عليها بتعتبر إن ترقية الموظف ده لمنصب إداري أعلى ليه آثار سلبية، يبقى إيه بقى الحل؟

ومن خلال تنفيذ هيكل فريق أفقي، هيقدر كبار الموظفين يشاركوا في عمليات حل المشكلات واتخاذ القرارات، وهيحسوا بأهميتهم وقيمتهم أكتر، وبالتالي هتزيد جودة ومعدل إنتاجهم.