موضوع سريع ... مشكلة كبيرة وحلها بسيط ...

حدث بالفعل :-

كان ليا 3 أصدقاء فتحوا محل ملابس ضخم ومخزن سنة 98 إتنين منهم شركاء والتالت خدوه يساعدهم ومسكوه المخزن وكانوا بيبيعوا كويس قوى وبيحققوا مكاسب على الورق لكن كانوا دايمًا بيلاقوا نفسهم خسرانين ومش قادرين يدفعوا فلوس الموردين لدرجة وصلت إنهم كانوا هايتسجنوا وبدأ بعض التجار تجمعلهم فلوس واتفقوا يفضوا الشركة بعد 6 سنين لأنها بتخسر ولأن كل واحد بيلقى اللوم على التانى فى أسباب الخسارة وقبل ما يفضوا وهما بيتحاسبوا إكتشفوا إن صديقهم التالت هو إللى كان بيسرقهم طول الوقت وعرفوا ده بالصدفة لأنهم لقوه بيشترى شقة تمليك ..... طبعًا الشركة إنفضت فعلًا لأن الخلافات نتيجة تحميل كل طرف للتانى الخسارة كانت سابت أثر كبير وكل واحد بدأ لوحده والحمد لله نجحوا بعد كده كل واحد لوحده ومعرفوش ياخدوا من الحرامى (صديق عمرهم التالت) أى حاجة .

وبناءًا عليه .... بالنسبة للناس اللى بتتعامل مع بضاعة وبالأخص البضاعة اللى موجودة على الرف زى الصيدليات والسوبر ماركت وحتى لو محل بقالة أو إكسسوارات والناس اللى عندها مخازن ... ياريت يا جماعة نفهم إن الناس زمان كان عندها أمانة دلوقتى مهما كان الراجل اللى إنت موقفه ومدى مظهره وثقتك فيه ومعرفتك بيه ممكن يكون بيسرقك و انت مش واخد بالك وبدل ماتشكك فى أمانته ياريت نعمل دورة مستندية محترمة ونشترى برنامج حسابات أو مخازن علشان نعرف رصيد البضاعة عندنا إيه (البرنامج هايفيدك فى حاجات تانية كتير) ونعمل جرد يومى لصنف واحد بشكل عشوائى .... يعنى مننتظرش نهاية السنة علشان أقفل المحل أو الصيدلية أو الشركة وأعمل جرد كبير إنما جرد يومى لصنف واحد أختاره بشكل عشوائى المفروض يبقى فيه دلوقتى منه 30 أروح أعدهم لو لقيتهم 28 يبقى فيه 2 ناقصين إما غلطة من صنف تانى أو سرقة ملهاش حل تالت ..... وبدل ما أضيع مكسبى وأضيع مجهودى ومجهود شركائى فى معرفة الخسارة جاية منين أريح نفسى من ده كله وأشترى جهاز كمبيوتر (الكمبيوتر له استخدامات تانية غير الفيس بوك والشات وبرنامج ممكن تمنه يكون من 500ج لحد 2000 ج ويكون حد أعرفه جربه كويس وأتعب نفسى وأتعلم أنا عليه كويس قوى لدرجة تخلينى أدرب أى حد عليه ...... يمكن الناس إللى فتحت سنة 98 يكونوا معذورين إنهم مجابوش كمبيوتر بس مش معذورين إنهم بيتسرقوا كل المدة دى كانوا ممكن يعملوا جرد يدوى بس اللى فاتح شغل النهاردة سنة 2014 مستنى إيه ؟؟ إيه هو مش عذره ؟؟ الجهاز بالبرنامج مش هايعملوا 5000 ج وده مش رقم بالنسبة لرأس مال أى مشروع وحتى لو رقم تدفعه ولا تتسرق ؟؟ ولا حتى تشتغل بإحساس حد بيتسرق ؟

كفاية علينا مشاكل العملاء والبضاعة وتقلبات السوق مش لازم تزود عليهم مشكلة تانية من جواك ... وربنا يوفق الجميع ويرزقنا الأمانة ومايخليش حد يسرق أو يتسرق يارب