يوم السبت اللى فات اللى هو أجازة طبعاً كنت عايز أشترى شوية حاجات للولاد بمناسبة دخول المدارس ... المهم فيه مول جديد متخصص فى الملابس والأدوات فاتح جديد وموزع كوبونات فى النادى بخصومات 15% بشرط إن المشتريات تعدى رقم معين فقلنا ليه لأ نروح نجرب مش هنخسر حاجة .... المهم رحنا المكان وهو مكان جميل جداً وفيه معروضات جميلة جداً بس الحمد لله سوء الإدارة اللى هى مهارة بوظ ملايين الجنيهات اتدفعت فى مكان زى ده وعلشان كده دايماً بنقول الناس اللى بتدير أهم من الفلوس نفسها ... أنا هكلمكم على 3 حاجات قاتلة قدرت تبوظ مكان فخم معمول بملايين وبضاعة جميلة جداً فيها حاجات سعرها ممتاز ....

أول مشكلة إننا بعد ما اشترينا فى يوم أجازة يعنى الناس كلها هتنزل تشترى فيه نزلنا ندفع عند الكاشيير لقينا 8 كاشيرات شغال منهم واحد بس !!! وطبعاً بناء عليه فعلشان تمشى لازم تنتظر أكتر من نص ساعة لأن الكاشير اللى موجود واللى مموت نفسه من الشغل طبعاً مش كفاية لكل العدد ده من الناس .... الغريب بقى اللى خلانى أضحك إن مدير المكان اللى واضح إنه من كوكب تانى كل شوية ييجي بدل ما يساعده يكلفه بحاجات تانية بره شغله خالص ..... المشكلة إن الزحمة متوقعة بحكم إن الدراسة قربت وإنك عامل حملة ترويج وإن النهاردة السبت فليه بقى يا أخى مشغل كاشير واحد ؟؟؟ ليه يعنى ؟؟ ليه ؟؟؟؟؟

المشكلة التانية إنى بعد ما وصلت للكاشير بديله الكوبونات قاللى الكوبونات دى خلصانة .... قلتله مين اللى قال كده أنا واخدها أول إمبارح من النادى ومش عليها تاريخ انتهاء صلاحية ... قام مشاورلى على يافطة وراه مكتوبة بالإيد بتقول إن آخر معاد للكوبونات كان 23-8 .... طيب العميل ماله ؟؟؟ لو عايز يبقى ليها تاريخ محدد اكتب على الكوبون مش تكتب على لوحة وتحطها فى ضهر الكاشير !!!!

المشكلة التالتة ودى تضره هو وتخليه آخر السنة هيطلع خسران من السرقة إنه حاطط الكاشير وبعد الكاشير صالة كبيرة قوى فيها بضاعة وبعدين باب الخروج .... إيه اللى يمنعنى إنى بعد ما أشترى وأحاسب أعدى على الصالة أحط فى الأكياس اللى معايا شوية بضاعة

ولا من شاف ولا من درى ...... المدام بتقوللى إنت زعلان إنه مستأمن الزباين قلتلها مفيش حاجة فى الإدارة اسمها كده .... حط الكاشيرات جنب باب الخروج علشان كده إنت أكيد بتتسرق .... وده معناه إن المكان هيتقفل بعد الخسارة وكل الناس دى هتخسر وظائفها وده كله ليه ؟؟؟؟؟

علشان مفيش دماغ بتدير ....

دى شوية ملحوظات جوهرية لأن فيه يجى 10 ملحوظات صغيرة على المكان اللى بيتكلف ملايين وشوية دماغ مبتفهمشى يعنى ايه عميل وبتخاف على المكان بتبوظه ...... ياترى كام واحد فينا بيبوظ مشروعه علشان حاجات بسيطة كده ؟؟؟؟

ياريت نبص على مشاريعنا ونقول ومنخفش اننا نطلع مشاكلنا ونحلها وربنا يوفق اللى عايز ينجح يارب ..

ولازم نفهم إن الفلوس مش كل حاجة الأهم منها الناس اللى بتدير الفلوس