بقالي 15 سنة تقريباً بشتري أحذية من ماركة معينة النوع ده غالي بس حمول جداً ومتوسط عمره تقريباً 10 سنين من غير ما يشتكي وانت في الآخر اللي بتستغنى عنه مش هو اللي بيبوظ

المهم إن الماركة دي جت من 3 سنين ونزلت حريمي بنفس المواصفات ... غالي وبيتحمل وعمره طويل وأنا كنت شايف إنهم هيحققوا نجاح باهر زي ما هما كانوا بيخططوا لكن للأسف نجاحهم كان ضعيف جداً جداً جداً جنب النجاح الرجالي ومعملش حاجة خالص من اللي كان متخطط ليه

كنت حريص جداً وعايز أعرف ليه هما فشلوا مع الحريمي رغم نجاحهم الساحق مع الرجالي ... المهم عرفت بالصدفة إن سبب عدم نجاهم في الحريمي هو نفسه سبب نجاحهم في الرجالي إن الأحذية معمرة وده ضد طبيعة الستات اللي عايزة تغير كل شوية ويهمها الموديل يبقى حديث وكمان بتستمتع بالشوبينج بعكس الرجالة اللي استخدامهم تقيل وعايزين حاجة تقعد فترة ولا يهتموا بالموديل وعملية الشراء بالنسبه ليهم مرهقة

نستفيد من ده إيه ؟ أولا لازم تدرس الشريحة الجديدة واحتياجاتها وعقلياتها كويس وبتحب إيه وبتكره إيه لأن اللي انت معتبره ميزة في منتجك ممكن يعتبر عيب لما تستهدف بيه شريحة تانية ....

ثانياً إنك لما تدرس الشريحة لازم تجيب حد من جوا الشريحة يعني أنا مثلاً لو أنا اللي بدرس الشريحه وبقول رأيي هقول إنها حاجة ممتازة بعكس لو واحده ست هي اللي بتقول رأيها ... يعني لو بتستهدف شريحة ستات يبقي تجيب ستات يقولوا رأيهم ... لو مراهقين تجيب مراهقين ماتجيبش أولياء أمورهم مثلاً

وربنا يوفقنا إننا نرفع من مستوى مؤسساتنا ومنتجاتنا