أفضل شراكة حصلت معايا كان فيها 3 شهور خطوبة

طيب هو فيه فى الشراكة خطوبة ؟ أيوة طبعًا كان عندى شركة قائمة وعرضت على شريكى الدخول وقدمتله ميزانيات وخطة عمل فدرسها وقرر الدخول واتفقنا على كل حاجة وقبل ما نمضى العقد قعد معايا 3 شهور يتأكد بنفسه من الأرقام وأتأكد بنفسى إننا مناسبين كشركاء لأنى كنت وقتها عندى حالتين شراكة قائمة لكن غير ناجحة وانتهت بعدها فعلاً

خلال ال3 شهور دول فيه أرقام كانت غلط زى مثلاً ديون للشركة وتم التأكد إنها مش راجعة أو بضاعة تالفة أو حتى بضاعة أنا شخصيًا كنت مقدرها برقم وإتباعت برقم أكبر .... بس كان فيه حاجة أكبر من الأرقام ألا وهى إننا عرفنا طباع بعض رغم إن فرق السن كان 15 سنة وفرق الطباع الكبير يعني مثلا في الوقت ده كان هو بيجى الشركة بدري جدًا ولأن كان معظم شغلنا فى محلات Show Rooms فأنا كنت باجى متأخر علشان أمشى الساعة 12 ليلاً علشان معظم المبيعات بتتم بعد 6 مساء بس فى الآخر لقينا إننا بنكمل بعض وحصل تقسيم أدوار واضح وتقسيم مسئولية ومعرفة كيفية الحساب من كل طرف .

بعد الموضوع ده ب 10 سنين لما جيت أشارك حد تاني وعلشان كنا من نفس السن ودفعة واحدة خليت فترة الخطوبة دي 6 شهور اتخانقنا فيها 10 مرات وعدلنا الاتفافات 15 مرة لحد ما رسمنا مسار واتفاق واضح ممكن ينجح الشركة الجديدة

فيه نقطة مهمة جدًا غالبية الشراكة اللى نجحت معايا نجحت مع الناس اللى مليش بيها علاقة إجتماعية أو صلة قرابة أو صداقة واللى فشلت فشلت مع ناس إما كان فيه صداقة قويه أو صلة قرابة وده ليه ؟؟

ل3 أسباب أولاً معظم الناس القرب منك بتكون ليهم صورة ذهنية معينة نتيجة التعامل مع إنهم في الشغل بيبقوا ليهم شخصية مختلفة تمامًا .

ثانيًا إن قربك من الشخص زى مثلاً أخوك أو أبوك أو صديق العمر بيمنعكوا إنتوا الاتنين إنكوا تفتحوا مواضيع ومواقف واحتمالات وافتراضات لأن بيبقى عيب أو ميصحش أو هو بيتكسف منك أو إنت بتتكسف منه وهكذا .

ثالثًا تدخل أطراف قريبة منكوا إنتوا الاتنين فى مواضيع وبيقلب الموضوع ودى وخواطر وبتضيع حقوق كتيرة مما يجعل الغريب أفضل لأن الاتفاقات بتبقى أوضح وبتتكتب فى ورق وعقود وهو عارف إنك عادى جدًا ممكن تشتكيه أو هو يشتكيك فبيبقى فيه حد أدنى من الخوف أو احترام الكلام اللى يخللى الدنيا تمشى

على العموم تجربة الشراكة تجربة مثيرة ومعقدة ولذيذة وممكن تبقى عنيفة وخراب بيوت وشركات

فالموضوع لازم يتم تناوله بشكل أعمق وبتفاصيل وإنك تتفقوا على الاحتمالات الوحشة قبل الحلوة وربنا يوفق الجميع للخير والنجاح