من فترة للتانية بنقرا عن وقائع تحرش مختلفة بعضها بيكون في الشارع والبعض التاني بيكون في أماكن العمل، وفي الوقت اللي الإثنين بيكون ليهم آثار سلبية جدًا، هنلاقي في الغالب إن حوادث التحرش في العمل بتكون أصعب من غيرها لأنها بجانب الآثار النفسية السلبية الفظيعة اللي بتسيبها على الضحية ممكن يكون ليها تأثير مدمر على مستقبلها المهني والوظيفي ورغبتها في العمل بعد كده.

طيب في البداية لازم نوضح إن التحرش هو كل سلوك غير مرغوب أو غير مرحب بيه وبيكون الهدف منه هو انتهاك كرامة شخص ما، أو خلق بيئة مخيفة أو معادية أو مهينة، والسلوك ده ممكن يكون كلمات منطوقة أو مكتوبة، أو تهديدات أو سوء معاملة، أو رسائل إلكترونية، أو سلوك جسدي.

ورغم إن مفهوم التحرش واسع زي ما إحنا لسه موضحين لكن هنلاقي إن معظم الناس فاكره إنه قاصر بس على التحرش الجنسي وده علشان هو الأوسع انتشارًا، ولأنه هو أكثر نوع بيتم تسليط الضوء عليه بكثافة في السنوات الأخيرة، وخلينا نقول إنه إذا ذكر التحرش الجنسي لازم نتكلم على طول على النساء لأنهم هم الضحايا الأبرز له.

وده بحسب الأبحاث اللي اتعملت خلال السنوات الخمسة اللي فاتوا، واللي أظهرت إن النساء بيعانوا من التحرش الجنسي أكتر من الرجال، وإنهم عندهم قدرة على تمييزه بشكل أكبر، وإنهم بيعتبروه مشكلة بيعانوا منها، ووفقًا للأبحاث كمان هنلاقي إنه كلما كانت السيدة أصغر سنًا كانت عرضة له أكثر من غيرها.

ومن الحاجات اللي بقت ملاحظة بشكل كبير في الفترة الأخيرة هو إن كتير من حوادث التحرش الجنسي اللي بيتم تسليط الضوء عليها حصلت في أماكن العمل وفي شركات كبيرة ليها وزنها، فهنلاقي مثلًا إن شركة "جوجل" أصدرت مؤخرًا بيان وقالت فيه إنها طردت خلال السنتين اللي فاتوا 48 موظف من بينهم 13 من المديرين الكبار في الشركة بسبب تورطهم في حوادث تحرش جنسي.

لكن الحقيقة إن البيان ده مطلعش من فراغ هو طلع بعد لما صحيفة "نيويورك تايمز" الأمريكية قالت إن في مدير تنفيذي سيء السمعة فيما يتعلق بالسلوك الجنسي لسه بيتابع عمله عادي جدًا في الشركة، وده بيخلي نسبة كبيرة من الناس تشوف إن السبب الأساسي ورا تكرار حوادث التحرش الجنسي في العمل هو تساهل أو تجاهل المؤسسات المختلفة للفعل والعواقب بتاعته.

زي إنه ميكونش عندها استراتيجية واضحة لمكافحة التحرش، أو الأسوأ بقى وهو إنها تكون حاطة سياسات لمكافحته لكنها مش بتطابقها بشكل فعال وده لأنها مبتكونش جادة في تلقي الشكاوى اللي من النوع ده، وكمان مبيكونش عندها استعداد لمعاقبة المتحرش وحماية الضحية.

ولأن الأصل في بيئة العمل هو إنها تكون آمنة وبتحافظ على كرامة الموظفين لازم إن كل مؤسسة وصاحب عمل يهتموا بإن مكان العمل يكون خالي من أي ممارسات سلبية وعلى رأسها التحرش الجنسي لأنه لو معملش ده هيدفع ثمن باهظ جدًا هيبدأ من انخفاض معنويات الموظفين وضعف الإنتاجية، وهينتهي بإمكانية رفع دعوى قضائية ضده.

علشان كده هنقولكم على خطوات ممكن تنفذها الشركات علشان تخلق بيئة عمل آمنة خالية من التحرش الجنسي، وهي:

- وضع استراتيجية واضحة لمناهضة التحرش الجنسي:

مهم جدًا إن كل مؤسسة يكون عندها استراتيجية واضحة لمكافحة التحرش الجنسي، الاستراتيجية دي بتتضمن تعريف التحرش الجنسي مع تقديم سيناريوهات لتوضيح أنواع السلوك غير المرحب به، والتنبيه بشكل واضح إنه مش هيتم التسامح مع أي شكل من أشكاله.

ومهم هنا جدًا إنه يتم تحديد العواقب المحتملة وإنها متتسابش مفتوحة يعني يتقال إن العقاب هيبدأ مثلًا بتخفيض الراتب، والنقل القسري، وبعد كده فقدان المرتب وفرص الترقية، وأخيرًا الطرد.

ده بالإضافة لوضع إجراءات واضحة لتقديم شكاوى التحرش الجنسي، والتعهد بالتحقيق بشكل شامل في أي شكوى تتلقاها المؤسسة، وبعدم التسامح مع الانتقام من أي شخص يشكو من التحرش الجنسي.

- تدريب الموظفين على مكافحة التحرش الجنسي:

من الحاجات الضرورية اللي بتكون مطلوبة من قسم التدريب في أي شركة هي إنه ينظم دورات تدريبية سنوية لكل العاملين من أكبرهم لأصغرهم، علشان توعيتهم بإنهم ليهم الحق الكامل في التمتع ببيئة عمل خالية من التحرش الجنسي، وبعد كده تحديد إيه هو التحرش الجنسي وأشكاله، وتعريف العاملين بسياسة الشركة تجاهه والإجراءات اللي ممكن ياخدوها في حال تعرضهم له وتشجيعهم على الإبلاغ فورًا عن أي واقعة بيتعرضوا ليها.

- متابعة مناخ وبيئة العمل في المؤسسة:

في أي شركة لازم يكون في متابعة لمناخ وبيئة العمل ودي حاجة ممكن يعملها صاحب المؤسسة بنفسه في الشركات الصغيرة، أو يتولاها قسم الموارد البشرية في المؤسسات الكبيرة وبتكون من خلال الخروج للموظفين والتحدث معاهم عن بيئة العمل، وتدوين ملاحظات شخصية عن المكان وبيئة العمل زي مثلًا وجود ملصقات أو ملاحظات مسيئة بتصدر من بعض المديرين أو الموظفين، وده بهدف الإبقاء على خطوط الاتصال مفتوحة واتخاذ إجراءات استباقية قبل وقوع أي مشكلة.

- توفير هيئة تحقيق مستقلة داخل المؤسسة:

في مؤسسات كتير ممكن تعتمد على إدارة الموارد البشرية أو المستشار القانوني علشان يحققوا في شكاوى التحرش الجنسي، لكن يُفضل إنه يكون في هيئة تحقيق مستقلة ويكون أعضاءها على قدر كبير من الاحترام والثقة داخل المؤسسة، وعارفين قانون العمل، وعندهم مهارات شخصية بتمكنهم من بناء علاقات مع مختلف الأطراف وتنفيذ خطة كاملة للتحقيق.

- الاستجابة السريعة والفعالة للشكاوى:

ممكن يكون عند الشركة استراتيجية جيدة لمكافحة التحرش لكنها مش بتطبقها أو بتطبقها بشكل فيه تراخي وده غلط جدًا لأن هيسمح بتكرار الحوادث وتعريض سمعة المؤسسة للانهيار.

علشان كده مهم جدًا إن أي شركة لما تتلقى شكاوى بشأن وقائع تحرش جنسي تاخدها على محمل الجد وتحقق فيها بشكل محايد وتاخد إجراءات لحماية الضحية من خلال نقلها إلى قسم آخر وتعريفها أن الخطوة دي بتستهدف تجنب انتقام المتحرش منها، ومع ثبوت الواقعة لازم صاحب العمل ينفذ توصيات المحققين اللي لازم تاخد في الاعتبار مدى خطورة الواقعة، والضرر اللي وقع على الضحية، والحوادث السابقة للطرفين.

- توثيق العملية:

بعد الانتهاء من كل الإجراءات السابقة دي، لازم تهتم بتوثيق كل الخطوات اللي تمت علشان تقدر الضحية تستخدمها في حال كان عندها رغبة إنها ترفع دعوى قضائية ضد المتحرش.