اتكلمنا في بوست سابق عن أفلام ملهمة لرواد الأعمال، وفيه ناس كتير طلبت جزء تاني منه، وكمان شاركونا بتجاربهم مع أفلام تحمل رسائل ملهمة في عالم البزنس، وإدارة الشركات

عشان كده قررنا نعملكم الجزء التاني من سلسلة أفلام ملهمة لكل رائد أعمال "Business Movies"، بنصح أي حد صاحب مشروع أم مهتم بالبزنس إنه يحطها في قايمة المشاهدات بتاعته ويتفرج عليها.

• النمر الأسود
من الأفلام اللي علمها الراحل "أحمد ذكي" وعلمت مع معظمنا، لكن اللي ممكن يكون غايب عن كتير مننا إن قصة الفيلم حقيقية وبطلها الحقيقي المهندس المصري "محمد حسن" اللي سافر ألمانيا سنة 1960 عشان يشتغل في الخراطة، وقدر يطور من نفسه لدرجة إنه أتقن 5 لغات، ده غير إنه واجه صعوبات كتير وقدر يتغلب عليها زي العنصرية، وكمان اتجه للملاكمة، وأثبت جدارته فيها لدرجة إنه مثل ألمانيا وحقق بطولات كتير، وفي النهاية دخل البزنس وأمتلك أحد الشركات في السويد.

الملهم في الفيلم ده إنه بيسلط الضوء على شاب مصري زيه زي كتير من الشباب اللي بيعاني من صعوبة الظروف، فبيضطر يسافر ويحقق نجاح في الرياضة والبزنس، ويمكن ناس كتير كانوا مستبعدين إنهم يقدروا يعملوا اللي عمله "محمد حسن" لكن دلوقتي أظن النظرة بقت مختلفة شوية.

• همام في أمستردام:
شاب مصري بيعاني من الفقر والبطالة، وهو (همام) اللي جسد شخصيته محمد هنيدي، وفي ظل ده كله خطيبته سابته وارتبطت بشخص تاني، بعدها بيقرر يسافر هولندا لخاله عشان يجرب حظه هناك، وطبعًا بيعاني ظروف صعبة، لدرجة إنه بيضيع فلوسه وجواز سفره، لكنه بيرفض يستسلم وبيقرر يكمل لحد ما بينجح في تحقيق حلمه وبيفتتح مشروعة في النهاية.

والفيلم ده زيه زي فيلم النمر الأسود بينقل تجربة كفاح واقعية لشاب مصري بيحاول يكون نفسه ويدخل عالم البزنس في إطار من الدراما والكوميديا، والأهم إنه بيتناول مرحلة الأولى لتأسيسي المشروعات الصغيرة والمتوسطة، وفيه دروس مفيدة عن التعرف على السوق وتحديد المنتج المناسب وتمويل المشروع في بدايته...إلخ

• Walt Before Micky:
فيلم درامي بيجسد السنوات الأولى من حياة "والت ديزني"، وإزاي عاش في بيئة صعبة مفهاش حد بيهتم بالفن وأبوه كان يجبره على العمل، ولحد ما بقي اسمه مرادف للرسوم المتحركة والترفيه في العالم كله.

الملهم في الفيلم إنه جسد الظروف الصعبة اللي عانى منها "والت" في بداية حياته، وإزاي قدر يتغلب عليها، وكمان يتناول بالتفصيل المراحل الأولى من تأسيسي شركة "ديزني" العملاقة، والتحديات اللي واجهة "والت" في عالم البزنس وريادة الأعمال.

• Guru:
فيلم سيرة ذاتية هندي عن " ظهير أمباني"، اللي بعتبر من أغنى أغنياء الهند، أحداثه بتدور حولين طفل في قرية فقيرة، بيلح على أبوه أنه عايز يكون غني، وفي المقابل أبوه بعتبر طموحة نوع من السذاجة، وبينصحة يعيش على قد ظروفه"، بعد كده الولد ده بيسافر تركيا عشان يشتغل، وهناك بيتعلم تجارة المواد الغذائية، وبيضحي بوظيفة اتعرضت عليه في سبيل دخول البزنس من بوابة التجارة عشان يكون واحد من أكبر رجال الأعمال في الهند والعالم.

والفيلم ده مفيد لرواد الأعمال؛ لأنه بيغطي الصعوبات اللي ممكن يواجهها رواد الأعمال العصاميين خصوصًا في تمويل المشروع، ده غير إن فيه مواقف إنسانية كتيرة متوظفة في سياق درامي وبتجسد رحلة الصعود من القرية الفقيرة لعالم البيزنس.

• Pursuit of Happiness:
قصة حقيقة بطلها كريس جاردنر اللي طور منتج، وكان مؤمن بيه بس مكنش عارف يبيعه إزاي! وفضل متمسك بيه لدرجة إنه خسر بيته ومراته وكل اللي حيلته، وبالرغم من كده مستسلمش وقرر يواصل العمل والكفاح وكون حياة جديدة لأبنه، وبدأ يطور من مهاراته وحصل تدريب مجاني للمضاربة في البورصة، ونجح في إنه يلاقي وظيفة، وبتطور الأحداث في الفيلم قدر يحقق أهدافه ويفتتح شركته.

والفيلم ده بيعتبر من أقوى الأفلام المحفزة لرودا الأعمال، لأن بطله اتعرض لكم كبير من المشاكل، وكان فاقد الأمل في أوقات كتيرة من حياته، وبرغم كده موقفش وده بيدينا درس مهم وهو إن اللحظة اللي بتقف فيها هي دي ممكن تكون إنطلاقتك الحقيقة، ده غير إنه فيه دروس كتير في البزنس زي: التواصل مع العملاء وطرق تمويل المشروعات.

• No Reservations:
طباخة مبدعة بترأس طقم الطباخين في واحد من أشهر مطاعم مانهاتن، وفجأة بتتعرض لأزمة عنيفة بتتمثل في موت أختها الوحيدة وانتقال بنت أختها عشان تعيش معاها، وفي ظل ده كله بتتطور الأحداث من خلال ظهور منافس قوي ليها بيحاول ياخد مكانها.

الملهم في الفيلم إنه بيعتبر من أهم الأفلام التي بيتعرض للجانب النفسي والاجتماعي في حياة رائد الأعمال، وبيقدملنا دروس مفيدة في مواجهة الأزمات من النوع ده في إطار درامي مصحوب بالكوميديا أحيانًا.

• Glengarry Glen Ross :
فيلم بيقتحم عالم التسويق العقاري، وبيسلط الضوء على الأكاذيب اللي بتحصل طول الوقت في النوعية دي من الأعمال بهدف تحقيق الأرباح، بتدور أحداثه عن 4 من مندوبي مبيعات يواجهوا مخاوف الطرد من وظائفهم لو محققوش التارجت المطلوب منهم، عشان كده بيحاولوا يحققوا أهدافهم بأي وسيلة حتى لو كانت غير شرعية.

والفيلم ده بنصح أي حد بيشتغل في المبيعات إنه يشوفه لأنه فيه دروس كتير جدًا، عن كيفية التعامل مع العملاء وإغلاق الصفقات، وبيسلط الضوء على القدرات الخارقة لرجال المبيعات في ظل الصراع نفسي والضغوط كبيرة بيواجهوها.

دي كانت الأفلام اللي وقع اختيارانا عليها الجزء ده، لو حد منكم شاف فيلم من دول يقولنا إيه الدروس اللي استفادها منه بخلاف الدروس اللي ذكرناها، ولو فيه أفلام تانية اتفرجتوا عليها ليها علاقة بالبزنس وطلعتوا منها بدروس ياريت تشاركوها معانا في الكومنتات.