بمناسبة نزول ال I Phone 6 افتكرت تصريح كان قاله ستيف جوبز مؤسس شركة أبل صاحبة I Phone قبل ما يموت إن الناس (مش محتاجه) تليفونات ذكيه بشاشه كبيره

وطبعا رغم عبقريته الإداريه الواضحه لكن كلامه طلع غلط وفكرني ده بتصريحين زمان شويه من بيل جيتس أغني رجل في أمريكا ومؤسس ميكروسوفت واحد قاله في مذكراته وهو إن العالم ممكن يبقي فيه 100 ألف كمبيوتر شخصي وطبعا ده أصبح موجود في مدينه واحده من العالم 

وتصريح تاني كان بمناسبة إنتاج أحد تطبيقات ويندوز وكان بيقول ( لن يحتاج أي شخص في العالم لذاكره في جهازه الشخصي أكبر من 64 ك

طبعا الذاكره تطورت لميجا وبعدين لجيجا وبرضه مش مكفيه

بعد سلسلة التنبؤات الخاطئه إتعلم بيل جيتس و تعهد بعدم التنبؤ بالاحتياجات المستقبليه للعملاء فيه مبدأ في البيزنس اسمه (Do Not Assume) يعني ماتفترضش في سلوك العملاء أي حاجه إنزل بنفسك وشوف هما محتاجين إيه لأنك لما بتفترض بتفترض إللي في دماغك مش اللي في الواقع ومش لازم العملاء يحبوا اللي انت بتحبه ولا تكون احتياجاتهم زي اللي في دماغك إنت

وكنت عرضت قبل كده حالة مصريه لما شركة عصائر مصريه نزلت منتج في نهاية التسعينيات ولقت إنه مش عليه طلب في الصعيد ولما درسوا الموضوع لقوا إنهم منزلينه بالشاليموه وعيب إن راجل صعيدي محترم يمشي بالشاليموه في الشارع والمحترمين اللي عملوا المنتج ده في القاهره افترضوا إنه عادي فقاسو العملاء علي نفسهم وافترضوا إنه مناسب وده غلط فرجعت الشركه ونزلت عبوات بغطا ونجحت

يبقي في النهايه متقعدش في مكتبك وتفترض إنزل واعرف بنفسك عملائك عايزين إيه ومتفترضش لا دلؤقتي ولا في المستقبل 

وربنا يوفق الجميع في تلبية إحتياجات عملاؤهم