Business plan - الجزء الأول

هنتكلم النهاردة عن الجزء الأول من موضوع ال Business plan وهو كتابة صديق صفحة إعمل بيزنس الأستاذ محمد سليم ولو فى أى استفسار خاص بموضوع الBusiness plan هيجاوب عليه الأستاذ محمد 

هنكلم عن موضوع الـ Business Plan وفى البوستات الجاية هايبان مدى أهميتها وقد إيه إنها مش بسيطة ومش صعبة وقد إيه إنها مهمه وقد إيه فى ناس غافلين عنها، والأهم هايبان لنا قد إيه إن كل واحد فينا عمل Business plan فى مرحلة ما من غير ما يحس لأن ظروف مشروعه ومشاكله وصلته لكده وبردو من غير ما يحس …

كيف تكتب بزنس بلان "Business plan" 

تعالوا بقى نعرف إزاى نعمل الـBusiness plan بشكل محترف ومنظم عشان نقدر بعد كده نتابعها ونمشى عليها ونعدلها فى الجزء الصح وفى الوقت الصح عشان تمنع خسائر ممكنة وتحقق نتيجة مرضية ... للعلم أى حد فاكر انى هاقوله 1+1=2 وهو ينفذ يبقى غلطان والأفضل يوفر وقته ومايتابعش البوستات الجاية لان الـ Business plan بتختلف من مشروع للتانى ومن شخص للتانى وهانشوف ده أثناء مناقشتنا أما بقى اللى هايتابع بدون شرط أو قيد :) فأنا هاحاول أخلي الموضوع ممتع بالنسباله على قد ما أقدر وافتكروا المثل اللى بيقول لا تعطني سمكة ولكن علمنى كيف اصطادها ... يللا بينا بقى نصطاد :)

طبعًا لو تسمحولى كلامى هيكون بالعامية عشان أوصل لكم بسرعة وتستوعبوا لأن المغزى هو الفهم مش الحفظ ( قولنا هنصطاد ها ؟ :) )

أنواع خطط العمل أو ال Business plans:

1- خطة عمل كاملة Completed business plan: ودى ممكن تاخد شهر اتنين وأحيانًا 3 شهور عشان تطلع فى صورتها النهائية .

2- خطة عمل سريعة Quick business plan: ودى لو عندك الخبرة الكافية بالمشروع بتاعك تقدر تعملها فى يوم واحد .

3- خطة عمل معدلة Customized Business plan: ودى بقى بتاعة الخلاصة ... يعنى ايه ؟ يعنى دى اللى بتركز فيها على الأجزاء اللى إنت قوى فيها بحيث تبين قد إيه إنت تعرف عن البيزنس بتاعك وقادر تديره بحيث اللى يقرا ال Business Plan بتاعتك يقدر امكانياتك وخبرتك مش بس كده لو كنت بتعرض خطتك دى على حد شريك أو ممول محتمل تقدر تقنعه يدخل معاك فى البيزنس أو بمعنى آخر (تطمنه على فلوسه واستثماره معاك ) وموضوع الخبرة والامكانيات ده هافهمهولكم قدام شوية وهاخلى كل واحد منكم يعمل اختبارات تبين امكانياته وقدراته وأغلبكم هايستغرب إزاى ما كانش عارف كده عن نفسه وازاى طول الوقت اللى فات ماستغلش مهاراته دى :).

• أيا كان نوع خطة العمل فهى معمولة عشان تتعدل ماهياش قرآن يعنى عشان كده اسمها خطة يعنى توقع وتحليل وتفكير وتدبير ونجاح التنفيذ مرهون بتوفيق ربنا والمتابعة الجيدة للخطة .

ما هي أهمية البيزنس بلان  Business plan :

- عندك فكرة وعاوز تقنع المستثمر اللى بيدور على مشروع يدخل فيه إن مشروعك أو فكرتك هى الأنسب له و اللى هاتحققله الربح اللى هو بيسعى له.

- البيزنس بتاعك بيجنى ارباح كويسه ومانتاش شايف بكره ... بمعنى مانتاش عارف تكبره ازاى أو فى اى اتجاه أو فجأة صابك الخوف من فقدان اللى وصلتله لأنك ماعدتش عارف إيه الخطوة الجاية.

- عندك بيزنس قائم بالفعل ومحتاج ممول أو شريك عشان تكبر خاصة لو البيزنس بتاعك Stable .

- معاك مبلغ وعاوز تستثمره فى مشروع لكن مش لاقى حد يقنعك أو لو أقنعك بتحس إنه كله كلام معسول وممكن يكون بيظهرلك المنافع ومخبى عليك المخاطر.

هنا بقى خطة العمل بتبين المكاسب والخسائر والمخاطرات المتوقعة وبأرقام كمان فبتشوف الصورة من فوق وده بيسهل عليك إنك تحسبها وتاخد قرارك وماتبقاش تايه، مثلًا لما حد يعرض عليك مشروع تعبئة خل الى بيستخدم فى الطعام وتعرف إن طن الخل الخام لما بيتخفف بالميه بيعمل 21 طن خل جاهز للاستخدام يعنى هاتجنى 20 ضعف اللى دفعته فى المادة الخام طبعًا شىء مغرى لكن لما خطة العمل اللى بتضم معلومات عن المنتج تبينلك إن نسبة البكتيريا يجب ألا تتخطى نسبة معينة ده يدق جرس فى دماغك فتسأل وان تخطت ايه اللى هايحصل ساعتها ؟؟؟ ممكن الاجابة هى اللى تحدد قرارك هل الضرر اللى هيقع على المشروع والمشاكل والقضايا والتعويضات بسبب خطأ قد يحدث يستاهل المخاطرة بمبلغ الاستثمار؟ وضحت كده ؟