Name: اعمل بيزنس
Address: 1 Ahmed Kamel st. from Ellaslky st. Maadi - Cairo - Egypt, Cairo, Maadi, 10019, Egypt
Telephone: 0020221609929
Price range: $$$

كيف تقييم نفسك لو هتقتح مشروع أو تعمل بيزنس بلان

هنتكلم مع بعض عن Self Evaluation Exercise أو ما يسمى تقييم الذات عشان كل واحد فينا يقدر يحدد هل هو الشخص المناسب لهذا النوع من البيزنس ( اللى هو اختاره ) ولا لأ

عشان تقيم نفسك لازم تحدد نقاط القوة و الضعف فى شخصيتك

(Strong & Weak points) , إزاى؟ بسيطة ... ورقة وقلم واكتب مميزاتك وقصادها عيوبك ... مش شرط تكون بالترتيب أو كل ميزة يكون قصادها عيب أبداً ... دى حاجة ودى حاجة تانية خالص ... نقاط القوة والضعف شاملة كل شىء سواء ليها علاقة بالبيزنس أو بشخصيتك حتى لو حاجة مالهاش علاقة بأى حاجة زى اتقانك لهواية معينة ... هانكتب كله كله كله لأن كل حاجة ليها استخدام وهاوضحلكم ده بعد مانعمل التقييم ... تعالوا بقى نبدأ وهاديكم مثال على نفسى ... لو انا هابدأ مشروع سوبر ماركت مثلاً هاقوم جايب ورقة وقلم وابدأ أقيم نفسى كالتالى :

نقاط قوتى :

• خبرة سابقة فى توزيع و بيع المواد الغذائية.

• قادر على وضع أهداف بيعية محددة.

• طباخ عشرة على عشرة

• أحب تربية الكلاب والحراسة خاصة.

• لما بحط حاجة فى دماغى بفضل وراها لحد ما أعملها مهما طال الوقت.

• أحب عمل الخير والتصدق.

• أراعى مشاعر الناس جدًا واحتياجاتهم.

• تربطنى علاقات جيدة جدًا مع عملائى السابقين من الوظائف السابقة التى عملت بها حتى الأن

نقاط ضعفى :

• عديم الصبر.

• سريع الغضب خصوصًا مع الأغبياء.

• مابحبش التفاصيل ولا أنتبه لها.

• رومانسى موت

• عند ظهور مشكلة أفضل تأجيل حلها.

• متردد أحيانًا كثيرة حتى فى ظل وجود أهداف محددة.

• متقطع فى الصلاة.

لاحظوا قبل ما نكتب الlist دى على طول قولتلكم اكتبوا كله كله كله حتى وإن كانت متعلقة بشخصك وليس لها علاقة بالبيزنس ... تعالوا بقى أقولكم ليه...

بعض نقاط الضعف فى شخصيتك ممكن تحدد ال conflict أو التعارض بين شخصيتك ونوع معين من البيزنس ممكن يؤدى إلى فشل هذا البيزنس ... مثلاً أنا كاتب إنى مابحبش التفاصيل وسريع الغضب مع الناس اللى مش بتفهم بسهولة يبقى ماروحش أفتح شركة توصيل انترنت واللى بتعتمد على الدعم الفنى من خلال الهاتف اللى فيها لازم أستحمل خطأ شكوى عميل لا يفقه شىء عن الكمبيوتر وبيقول النت فاصل وهو أصلًا مش موصل الكابل !. أو أشرح للعميل فى التليفون ازاى يحل المشكلة من عنده على الرواتر أو الجهاز مثلاً

- وطبعًا مش كل الناس بتفهم فى الراوترات و أجهزة الكمبيوتر وآخرهم الدابل كليك وموقع مصراوى - فالشرح ممكن ياخد وقت طويل والعميل يا عرف يمشى معايا الخطوات يا ماعرفش وطبعًا أنا مضطر أستخدم التليفون فى الدعم الفنى لإن إرسال فنى مختص هياخد يوم أو اتنين غير تكلفة الانتقال بينما أنا ممكن أحل المشكلة بالتليفون فى دقايق وده له اثره فى سمعة المركز أو الشركة بتاعتى وعلى زيادة عدد المشتركين أو هروبهم بناء سرعة التعامل مع المشاكل ..

مثال كمان ... مثلًا بما إنى رومانسى وحبوب آخر حاجة (والليستة مابتكدبش) ماروحش أفتح مشروع كوافير حريمى لأن أنا كده بسعى على خرابى مستعجل وماعادش فيها شغل بقى ... بالمثل فى نقاط القوه أكمنى بحب تربية الكلاب ده مايخلينيش أفتح نادى تدريب كلاب أو عناية بيها أو مزرعة للكلاب مثلاً (بالمناسبة ده مشروع مربح جدًا وانتشر خاصة الفترة الأخيرة) لأنى محتاج أكتر من حبى للشىء عشان أقدر أنجح زى مثلاً الخبرة السابقة فى مشروع مشابه ... ولا لأنى بطبخ كويس هاقدر أفتح مطعم ناجح لافتقارى لمهارات الادارة والحسابات وكمان (الهايجين) اللى هى النضافة وكده وزارة الصحة هاتجيبلى ضرفه بدرى بدرى ده لو ما اتعمليش خمس ست محاضر على 12 – 13 غرامة... وصلت كده ؟

ملحوظة:

نقاط القوه والضعف بتاعتى دى مش حقيقية دى مثااااااال بس ... يعنى لا انا رومانسى ولا عمرى عتبت مطبخ الا عشان أشوف الحاجه طابخة ايه

المقال اللى جاى هنتكلم فيه عن التقييم التانى اللى هو " المهارات العامة والخاصة اللى محتاجها المشروع بتاعى (General & Specific skills)