لما بنيجي نتكلم عن الإستراتيجيات التسويقية الناجحة واللي سمعت بشكل كبير مع الناس هنلاحظ دائمًا إن الإستراتيجيات التسويقية دي اهتمت إنها تعمل حاجة أكبر من فكرة الترويج لعلامتهم التجارية وبس، وده بالتبعية بيأثر بقوة في الجمهور المستهدف وبيخليهم مش بس يفكروا في المنتج زي أي حملة عادية لكن كمان يحبوا يعرفوا أكتر عن الصناعة اللي بينتمي ليها المنتج ده وموقعها في العالم.

صحيح الطريقة دي من الإستراتيجيات التسويقية بتستخدمها الشركات الكبيرة والمالتيناشيونال لكن كمان الشركات الصغيرة تقدر تعمل ده إذا فكرت بشكل مختلف، وقدرت تعمل إستراتيجيات تسويقية مبدعة وده هيخليها تعزز علامتها التجارية وتجتذب عملاء جدد ليها.

أفكار واستراتيجيات تسويقية إبداعية ممكن تنفذها في حملتك علشان تحقق تأثير كبير وفعال:

1- قدم هدايا لعملائك:

واحدة من أفضل الطرق اللي بتساعد على جذب انتباه العملاء هي المسابقات والهدايا، لكن لازم نعرف كويس قوي إن الاستراتيجية دي بتتيح لك تفاعل كبير مع علامتك التجارية إلا إن الموضوع بياخد وقت ومجهود علشان تقدر تحول التفاعل ده لمبيعات حقيقية.

ومن أمثلة الهدايا اللي ممكن تتيحها للجمهور هو إنك تمنحهم تخفيض بنسبة معينة في مقابل دعوتهم لأصدقائهم للإعجاب بصفحتك على الفيس بوك أو تنزيل التطبيق الخاص بك.

أما المسابقات فعلشان تقدر تنجح في تنظيمها ويكون ليها تأثير إيجابي ممتد معاك لازم يكون في تناسق بين الجائزة المقدمة والجهد المطلوب بذله لحل المسابقة يعني ما بتطلبش حاجات كتير من الجمهور، ولازم كمان تاخد بالك من إن الجوائز تكون متوافقة مع اهتماماتهم، وده مش معناه إن الهدايا اللي هتقدمها المفروض تكون غالية أو قيمتها عالية إنما بتناسب شخصية جمهورك وطباعهم.

2- امزج بين التصميمات الفنية والتسويق الإبداعي:

لما بيحصل تعاون بين المسوقين والفنانين بيخرج من تحت إيديهم استراتيجيات تسويقية قوية ومبدعة جدًا، يعني مثلًا الموقع الإلكتروني لأي شركة لو تم تصميمه بالتنسيق بين المسوقين والمصممين هيخرج بشكل جذاب ووظيفي في نفس الوقت، وده هيخلي تجربة العميل عليه سهلة وسلسة ويحب يعيد تجربتها أكتر من مرة.

علشان كده بنقول إنه مهم جدًا في التسويق الرقمي إن إحنا ندي أولوية للتصميمات الجديدة والجذابة اللي مبنية على صور جميلة وعالية الجودة.

3- استخدم الفكاهة:

واحدة من طرق التسويق الفاعلة هي إنك تخلي عملائك يحسوا بالسعادة والتسلية لأن ده هيخليهم يتفاعلوا مع شركتك والمنتج أو الخدمة اللي بتقدمها ليهم بشكل إيجابي، لكن مهم جدًا استخدام الآلية دي بحرص علشان متكونش متكلفة وتجيب نتيجة عكسية.

وممكن تنفيذ الطريقة دي من خلال الاعتماد على شخصيات كارتونية بتقول حوار فكاهي أو الاستعانة بوجه كوميدي محبوب لدى عملائك.

4- استخدم وسائل التواصل الاجتماعي بشكل مختلف:

يعتبر تواجد الشركات على وسائل التواصل الاجتماعي من الأدوات المهمة في التسويق في الفترة الحالية لكن ده ميعنيش أبدًا إن التواجد عليها هيسمح لنا على طول بالتسويق لمنتجاتنا وخدماتنا بشكل فعال.

لأن نجاح الحملات التسويقية على مواقع التواصل الاجتماعي مرتبط باختيارك للمنصات الأنسب لكل منتج عندك وده علشان تنجح في خلق تجارب تسويقية جديدة وغير متوقعة وكمان تستهدف فئات مختلفة من الجماهير.

يعني واحدة من الطرق المبتكرة للإستراتيجيات التسويقية من خلال مواقع التواصل الاجتماعي هي السماح للعملاء الأكثر ولاء للعلامة التجارية بالاشتراك في إدارة حساب شركتك على واحدة من المنصات الاجتماعية من خلال منحهم حق الوصول للحساب ونشر وجهة نظرهم عن المنتجات وعاداتهم في استخدامها.

5- اعتمد على الغموض:

في حياتنا العادية أي شيء غامض دائمًا بيثير فضولنا وبنبقى عايزين نعرف إيه أصله وفصله، نفس الحاجة في التسويق لما بتعتمد على استراتيجية تسويقية مبنية على الغموض هتلاقي الناس عندها رغبة قوية في اكتشاف المنتج أو الخدمة اللي بتقدمها، ودي حاجة ممكن تعملها من خلال استخدام شعار جذاب وغامض ومعاه كلمة "قريبًا" وتحطها على موقعك الإلكتروني أو صفحة الشركة بتاعتك على الفيس بوك.

6- تكوين الشراكات:

تعتبر الشراكات واحدة من الأدوات التسويقية اللي بتجذب انتباه العملاء لما بيتم تنفيذها بطريقة غير متوقعة، يعني لو مكنتش مهتم بتنفيذ شراكات مع الآخرين أو كنت بتعمل ده في نطاق ضيق أنت محتاج تعمل ده بشكل أكبر لأنه بيخلي عملائك يشوفوا علامتك التجارية بطريقة جديدة، علشان كده مهم جدًا إنك تحط استراتيجية للحملة التسويقية الخاصة بالشراكة علشان تبقى بتمثل النشاطين التجاريين للمؤسساتين بشكل فعال للعملاء المحتملين والعائدين.

7- التسويق التجريبي:

استخدم وسائل التواصل الاجتماعي الجماهيرية بالنسبة للنشاط بتاعك وادعوا جمهورك لحضور فعاليات متنوعة لتجريب المنتج أو الخدمة اللي أنت بتقدمهلهم لأنها تعتبر فرصة مثالية جدًا لأنهم يعرفوا اللي بتقدمه وفرصة ليك إنك تتعرف على عملائك عن قرب.

ونقدر نقول إنه مهم جدًا لأي شركة إنها تراجع من وقت للتاني استراتيجيتها التسويقية وتجرب طرق جديدة علشان تفتح لنفسها مساحات إبداع جديدة وبالتالي توسع دائرة عملائها، ووارد جدًا إن في استراتيجيات ممكن تفشل لكن الأكيد إنها هتسلط الضوء على تفاصيل كانت غايبة عن أصحاب المؤسسات عن جمهورهم المستهدف.