على مدار فترة شغلي قابلت شخصيات كتير أوي كنت بحسهم طالعين من فيلم أو مسلسل أو برنامج تلفزيوني شهير، ولو مش مصدق كلامي تعالا نعمل تجربة بسيطة يعني مثلا بص على المكتب اللي جمبك وركز شوية مش بعيد تلاقي مدام عبلة كامل قاعدة تندب على التاسك اللي مش راضي يخلص، أما لو لفيت الكرسي بتاعك الناحية التانية غالبا هتلاقي الأستاذ احمد عبد العزيز وهو عمال يتشحتف بشكل أوفر للمدير عشان يرجعله خصم الربع يوم تأخير، طب بلاش كل ده اضرب بعينك كده على المدير شخصيا مش بعيد تلاقيه قاعد نافش ريشه ولسان حاله بيقول للموظف اللي قدامه "أنا سعد الدالي إنت مين؟".

وبما إن الشغل عامل زي الأفلام والمسلسلات فأكيد مش كل الشخصيات وحشة وممكن تلاقي شخصية طيبة زي الأستاذ كمال أبو رية لكن للأسف الشخصيات المحصورة في أدوار الشر واللي بيقوم ببطولتها الأستاذ غسان مطر والفنان عادل أدهم كتيييير، وبما إننا بنكون مضطرين نشتغل مع كل الشخصيات دي 8 ساعات أو اكتر بشكل يومي، ففي البوست ده هنركز على بعض الشخصيات الدرامية الصعبة في الشغل وهقولك ازاي تتعامل معاها:

1. مرجان أحمد مرجان
وده صاحب الشركة اللي تحس انه شاري الموظفين بفلوسه، فلو موظف قال فكرة كويسة في الشغل تلاقي عمنا مرجان ده بيتصرف على إنها خلاصة بنات أفكاره ولو مشروع نجح ده بيكون بفضل تعليماته وتوجيهاته الحكيمة مش عشان في موظفين تعبوا وطلع عينهم عشان ينجحوه، وبما انه محور الكون فبيشوف انه لازم يكون هو الواجهة ومبيعترفش بفضل حد غير نفسه.

النوعية دي من المديرين غالبا بنلاقيهم في الشركات العائلية اللي بيكون صاحب الشركة دي لامم فيها أهله وصحابه ومعارفه، وبيكون أفضل تعامل مع النوعية دي من المديرين خاصة لو كانت حابب إنك تستمر في الشغل هو إنك دايما تقدم أفضل حاجة عندك وتتعامل معاه بشكل إيجابي مش بعدوانية وتشكره على أي نصيحة أو مساعدة يقدمها، بس في نفس الوقت لازم متوافقش على أي تنازلات ضد مبادئك حتى لو اضطريت تسيب الشغل.

2. فتحية مرات سيد كشري
الست فتحية الحشرية مرات سيد كشري في مسلسل "لن أعيش في جلباب أبي" موجودة في كتير من الشركات، ودي اللي بتبقى طول النهار والليل مش بتعمل حاجة غير إنها تنم وتتكلم في ضهر زمايلاها وتجيب في سيرة الرايح والجاي ومش بتسيب حد في حاله، ولو فيه صدفة سيئة جمعتك في قاعدة نميمة معاها غالبا هتلاقي نفسك ضحية لعادتها السيئة دي بعد كده.

الشخصية دي غالبا بتبقى حاسة بعدم الأمان خاصة لو كان فيه حد انجح منها في الشغل وبتخلق دراما في المكتب عشان تبعد الاهتمام عنها وعن أدائها السيئ، وبيكون أفضل تعامل مع الست فتحية دي إنك تتجنب أي حديث فيه نميمة على حد من زمايلك معاها وكمان حاول متدخلش معاها في أي نقاشات أو تعرفها تفاصيل شخصية عنك.

3. كابتن شلبوكة
وده شخص مبيقبلش إن الرد على سؤال زي "أخبارك إيه" يكون مجرد كلمتين تلاتة زي "الحمد لله"، لأنه بيبقى عايز يرغي ويفتح في حوارات ملهاش أول من آخر وبالتالي بيضيع وقتك في الاستديو التحليلي اللي لازم يعمله كل يوم بحكاياته التي لا قيمة لها على الإطلاق، وبيكون حظك اسود بقى لو وقعت في كابتن علاء عبد العال وده بيبقى ليفل أعلى شوية لأن فوق كل الرغي اللي قولنا عليه بتلاقي حكاياته كلها بتشع كئابة وطاقة سلبية وإحباط.

وعشان تعرف تتخلص من الشخصيات دي لازم تبيّن دايما إن في حاجة ملحة لازم تعملها ومش هاينفع تقف تتكلم معاه وممكن كمان تعمل سيم مع بقية زمايلك فأول ما يلاقوه هيرغي معاك، واحد منهم يكلمك على تليفونك وتستأذن عشان تروح ترد على المكالمة " مش هاتيجي غير كده للأسف".

4. الأستاذ أبو الخير
لو اتفرجتوا على فيلم "مراتي مدير عام" فأكيد لا يمكن تنسوا شخصية الأستاذ أبو الخير اللي كان قايم بدورها توفيق الدقن، والحقيقة إن الأستاذ أبو الخير كان شخصية كومبو 3×1 بتمثل نوعية كلنا عارفينها كويس، فمن ناحية هو كان العصفورة اللي بينقل الأخبار للمدير، ومن ناحية تانية كان أبو العريف اللي بينقل أخبار غلط لزمايله من وعن المدير، أما مهمته الأكبر كانت الطبلة في محاولة منه انه يوصل لمرتبة اعلى في شغله مش بعرقه ومجهوده لكن بتطبيله والنفخ في المدير وفي أفكاره النيرة وقراراته الحكيمة.

الشخصية دي ممكن تلاقي المدير بيتعامل معاها بشكل إيجابي فبصراحة كده مين مبيحبش يسمع مجاملة من الوقت للتاني، بس عشان متفكرش بشكل سلبي لازم تفهم إن الحب غير الاحترام ممكن المدير يكون بيحب يسمع المجاملة بس ده مش معناه انه بيحترم الشخصية اللي بتتملقه على الفاضي والمليان دي، وبيبقى أفضل أحل في التعامل مع الشخصية دي هو التجاهل وإنك تركز في نفسك وفي شغلك وبس.

الشخصيات الدرامية الليي بنقابلها في الشغل كتيرة ومبتخلصش، ولو عدى عليكم النوعيات دي من الشخصيات أو غيرها ياريت تحكولنا تجربتكم معاها في التعليقات وتقولولنا ازاي قدرتوا تتعاملوا معاهم.